Бясалгалын Шинжлэх Ухаан: Гималайн Их Багш Свами Рама

Яг л олон талт очир эрдэнэ мэт Свами Рама нь маш олон гайхалтай чадвартай хүн байсан юм. Тэрээр хосгүй гайхамшигт оюун санааны Их Багш, хүний их эмч, олонд танигдсан эрдэмтэн, нэртэй зохиолч, уран зураач төдийгүй хүмүүнлэгийн үйлстэн байсан билээ. Түүнийг өөрөө мэдэхээс ч өмнө түүний агуу бөгөөд өлзийтэй хувь заяаг Гималайн мэргэд мэдэж байсан ажээ.

Тэр хүмүүсийг энгийн боловч гэгээнтний амьдралаар амьдрахыг зоригжуулж, бясалгалын чухал болохыг онцлон хэлэхдээ, “Бясалгал танд тогтуун тайван ухааныг өгөх болно. Бясалгал таны дотор гүн байх Үнэн Чанарыг сэрээх болно. Бясалгал таныг айдасгүй болгож, амар амгалан болгох болно, бясалгал таныг уян зөөлөн болгоно, бясалгал таныг хайраар дүүрэн болгох болно, бясалгал таныг айдсаас чөлөөлнө. Эдгээр нь бүхэлдээ бясалгалын үр дүн юм хэмээжээ.

Үнэндээ, Багшийн сургаалийн ноёлох гол мөн чанар нь нөхцөл болзолгүй хайр байсан юм. Тэр хэлэхдээ “Хайрлаж сур, энэ нь хөгжлийн хууль юм…. Өгч сурна гэдэг нь хамгийн агуу урлагийн нэг мөн. Гэрт байгаа хүмүүстээ, хамт амьдардаг хүмүүстээ аминч бусаар өгөгтүн. Тэндээс эхэлж хийгээрэй. Хайр нь таныг бүрмөсөн өөрчлөх болно , зөвхөн хайранд л тэр хүч оршино…”

Свами Рама нь насан туршдаа цагаан хоолтон байсан. “Цогц Эрүүл Мэндийн Дадлын Хөтөч” номондоо тэрээр сүнслэг зам мөрийг дагаж буй хэн бүхэнд ургамалд суурилсан хооллолтыг зөвлөдөг. Цагаан хоолны хэв маяг бол мөн эрүүл мэндэд маш тустай бөгөөд мах иддэг хүмүүс цусны даралт ихсэх, өтгөн хатах, хавдар болоод зүрх судасны өвчинд өртөмтгий байдаг. Цагаан хоолны хэв маягийн ашиг тусыг настай хүмүүсээс мэдэгдэхүйцээр харж болох бөгөөд настай цагаан хоолтнууд мах иддэг хүмүүсээс илүү саруул ухаантай, эрүүл биетэй болоод урт насалдаг, гэж тэрээр хэлжээ.

Амьдралынхаа туршид тэрээр сүнслэг оюун санаа, иог, цогц эрүүл мэндийн талаар хэдэн арван ном туурвисан. Хамгийн сайн танигдсан ном нь түүний намтрыг өгүүлсэн “Гималайн Их Багш нартай хамт Амьдрахуй” юм. Энэхүү номонд түүний ариун дагшин уулсаар хийсэн аялал, түүний уулзсан гайхамшигт гэгээрсэн мэргэдээс сурсан ухаарлын талаар өгүүлдэг байна.

1994 онд Свами Рама түүний томоохон ололт болох Гималайн Институт Эмнэлгийн Халамжийг байгуулсан ба үүнд эмнэлэг болоод нутгийн 1000 гаруй алслагдсан тосгодод халамж үзүүлэх Тосгоны Хөгжлийн Хөтөлбөр зэрэг багтдаг байна.